دسمبر 10, 2019

د ملکي تلفاتو بوږنوونکی ډيرښت، او د بهرنیانو مسئولیت…!!

د ملکي تلفاتو بوږنوونکی ډيرښت، او د بهرنیانو مسئولیت…!!

د ورځي خبره:

که څه هم په افغانستان کې د امریکا په مشرۍ بهرني یرغلګر ادعا لري چې د جګړې او وحشت واک یې دا مهال خپلو ګوډاګیانو ته سپارلی، او هغوی دی چې په کلو او بانډو کې، شپني عملیات ترسره کوي، له طالب سره د جګړې په پلمه، ولسي خلک، مدرسې، ښوونځي، کلینیکونه، دوکانونه، وړوکي بازارونه او نور عام المنفعه ځایونو تر بریدونو لاندي نیسي، وحشیانه چاپی ورباندي وهي، بمباروي یي، اورونه ورته اچوي.

بهرني یرغلګر داسي څرګندوي چې ګویا په دغو بشري جنایاتو کې د دوی ونډه د نیشت برابره ده، مګر د عمل په میدان کې موږ وینو چې په هر وحشت کې یرغلګر تر خپلو مزدورو قاتلانو وړاندي وړاندي وي.

څو ورځې وړاندې د بغلان ولایت په ډنډ شهاب الدین سیمه کې پر یو ملکي کور بمبار کې د ښځو او ماشومانو په ګډون ټوله ۷ کسیزه کورنۍ له منځه وړل، بیا د هرات په شینډنډ کې ۹ تنه ملکيان شهیدانول، ورپسي د میدان وردګ دایمرداد ولسوالۍ تنګې سیمه کې پر روغتون برید کې ۴ تنه ملکيان په شهادت رسول، ورپسي بیا د میدان وردګ جغتو ولسوالۍ کې د شپنۍ چاپې پرمهال ۱۴ تنه ولسي افغانان، چي څلور تنه یې د یوه سړي زامن وو قصداً په شهادت رسول، او بیا تېره ورځ د ارزګان په ګيزاب کې د بمبار له امله ۳۵ تنه عام وګړي چې د پخواني حکومتي والي د کورنۍ غړي هم پکښي وو، شهیدانول، او په عین حال کې پرون مازیګر ناوخته د لوګر مرکز اړوند کمالخیلو سیمه کې پر جومات بمبار کې ۱۵ تنه لمونځ کوونکي په شهادت رسول، او داسي نوري ډېري پیښي دي چې بهرنی یرغلګر یي مستقیماً د خپلو کورنيو مزدورو قاتلانو په ملتیا ترسره کوي.
له دې نه ښکاري چي یرغلګر ډبري ولي او لاس ترشا نیسي، د افغان ولس عام وژني ته یې پخپله ملاتړلي، او رنګ یې داسي ورکړی چې دا جنایات یوازي د کابل ادارې اجرتي قاتلان ترسره کوي، حقیقت دا دی چې دا هرڅه د امریکایی یرغلګرو په مستقیم مداخلت ترسره کیږي، په هره پیښه کې یې امریکایی عسکر، یا بلیک واټر قراردادیان او یا نور جګړه ماران دخیل وي د کورنیو ګوډاګیانو په ملتیا زموږ بې دفاع ولس په بې رحمۍ سره را وژني.

بهرني یرغلګر باید په دې پوه سي چې له دښمن سره جګړه بیل شی دی او د عامه ولس وژنه چې یو نه بښونکی بشری جنایت دی؛ بیل شی دی، له دې مسئولیته دوی هیڅکله خپلي اوږې نشي خلاصولای، د تاریخ په محاکمه کې به دوی هرو مرو د دې ځواب وایی، نړیوالې ټولنې، بشري نهادونه، رسنۍ او حقوقي ادارې باید په افغانستان کې د روان بشري ناورین په وړاندي د یرغلګرو او د هغوی د کورنیو اجرتي قاتلانو د فجایعو د مخنیوي آواز پورته کړي، او د بې دفاع ولسي خلکو د ژوند ژغورني په اړه خپل مکلفیت آدا کړي.

پای ………!
د ورځي خبره
سشنبه ۱۶ جولای ۲۰۱۹م

Related posts