جولای 23, 2019

دامت سرلاري

دامت سرلاري

لیکنه:حامد افغان

 عمر بن عبد العزیز د الله وېره او مسلمانانو سره مینه 

په اسلام کې د عمر بن عبد العزيز بن مروان بن الحکم (وفات: ۱۰۱هـ) رحمه الله مقام دومره لوړ دی چې پنځم راشد خلیفه (خامس الخلفاء الراشدین) بلل کیږي، نوموړي دوه کاله او پنځه میاشتې خلافت کړی دی، د اهل السنة لوی امام احمد بن حنبل رحمه الله وایي: څوک چې د عمر بن عبدالعزیز د ژوند له حالاتو خلک خبروي پوه شئ چې په ده کې خیر دی.

ځکه خو د ده په ژوند ګڼ شمیر کتابونه لیکل شوي دي، لکه د امام مالک رحمه الله  د شاګرد عبد الله بن الحکم رحمه الله کتاب: سيرة عمر بن عبد العزيز، د ابن الجوزي رحمه الله کتاب: سيرة عمر بن عبد العزيز، د علامه عبد الرؤف المناوي رحمه الله کتاب: سيرة عمر بن عبد العزيز، د احمد زکي صفوت کتاب: عمر بن عبدالعزیز، د عبدالعزیز سید الاهل کتاب: الخلیفة الزاهد. دا راز د اسلامي تاریخ لویو کتابونو کې د ده حالات په پوره تفصیل سره بیان شوي دي.

په اموي خلفاوو کې دی یواځنی خلیفه و چې آن عباسي خلفاوو یې هم احترام کاوه، عجیبه خو دا ده چې اهل تشیع هم هغه ته احترام لري، پر دې علاوه دی عیسایانو او نورو کفارو ته هم د احترام وړ شخصیت دی، د محمد بن معبد په نوم یو کس وایي: زه د روم واکمن ته ورغلم، هغه پر ځمکه ناست و او سخت خپه و، ورته ومې ویل: څه چل دی ولې دومره خپه یې؟ ول ته نه یې خبر خورا لویه پېښه رامنځته شوې ده؟ ما وویل: څه پېښه؟ د روم پاچا راته وویل: د مسلمانانو خلیفه عمر بن عبد العزيز وفات شوی دی، هغه زیاته کړه: زما یقین دی که له عیسی بن مریم عليهما السلام وروسته بل چا مړي راژوندي کولی شوی نو هغه به عمر و!

د عمر بن عبد العزيز رحمه الله د مړینې شپو ورځو کې چا یو عيسايي راهب وليدی چې ژړل یې، کله یې چې د ژړا د سبب پوښتنه وشوه هغه ورته وویل: ځکه ژاړم چې د ځمکې پر مخ یو نور و او له نن وروسته به هغه نور نه وي.

څه فکر کوئ! دا به کوم عمل و چې عمر یې دې لوړ مقام ته رسولی و؟ له نورو ګڼ شمیر اسبابو سره دوه یې دا دي: له الله نه وېره او له مسلمانانو سره مینه! د ده له مرګ وروسته  څو کسان د ده مېرمنې فاطمه بنت عبد الملک رحمها الله تعالی ته ورغلل او د هغه د ځانګړي عمل پوښتنه یې وکړه هغې ورته وویل: په الله قسم هغه ستاسو نه په لمانځه او روژه کې زیات نه و، خو په الله قسم ما د ځمکې پر مخ داسې انسان نه دی لیدلی چې د عمر په څیر دي له الله نه وېریږي. والله ما کان عمر باکثرکم صلاةً ولا صیاماً، ولکني والله ما رئیت عبدا لله قط کان اشد خوفا لله من عمر.

له خلکو سره د مینې په اړه یې هغه کیسه کافي ده چې کله یې د خلافت په لومړي کال د بیت الله متولیان ورته راغلل او ورته ویې ویل: هر کال به د وخت خلیفه بیت الله ته نوی غلاف ورکاوه، سږ کال به تاسو بیت الله ته ښکلی غلاف راکوئ، ده ورته وویل: په الله قسم په سرو زرو کې د بیت الله تر پوښلو د یوه غریب ګیډه مړول ما ته ډېر خوند راکوي، ځئ بیت الله پوښونو ته اړتیا نه لري. الله دې له عمر نه راضي شي.

Related posts